Where Is Mojtaba Khamenei: મોજતબા ખામેનેઈને ઈરાનના સર્વોચ્ચ પદ પર બિરાજમાન થયાને બે અઠવાડિયા થવા જઈ રહ્યા છે, પરંતુ તેઓ હજુ સુધી સાર્વજનિક રૂપે જોવા મળ્યા નથી. 28 ફેબ્રુઆરીએ અમેરિકા અને ઈઝરાયેલના હુમલામાં તેમના પિતા અને સુપ્રીમ લીડર અયાતુલ્લા અલી ખામેનેઈના મૃત્યુ બાદ 9 માર્ચના રોજ સર્વોચ્ચ નેતાના પદ પર મોજતબાની નિમણૂકની જાહેરાત કરવામાં આવી હતી. આ પછી 12 માર્ચે તેમનું પ્રથમ નિવેદન આવ્યું અને 20 માર્ચે તેમણે ઈરાની નવું વર્ષ ‘નવરોઝ’ નિમિત્તે સંદેશ આપ્યો. બંને પ્રસંગોએ તેઓ સામે આવ્યા નથી, પરંતુ સરકારી ટીવીએ તેમનો સંદેશ વાંચી સંભળાવ્યો હતો. આનાથી તેમને લઈને રહસ્ય ઘેરું બન્યું છે.
જીવિત છે મોજતબા ખામેનેઈ
એક પ્રશ્ન એ પણ ઊભો થાય છે કે શું ઈરાનના નવા સુપ્રીમ લીડર જીવિત પણ છે? જોકે, ઈઝરાયેલી મીડિયા રિપોર્ટ જણાવે છે કે મોજતબા ખામેનેઈ જીવિત તો છે, પરંતુ દેશ પર અસલી નિયંત્રણ તેમનું નથી. ‘જેરુસલેમ પોસ્ટ’ એ સૂત્રોને ટાંકીને જણાવ્યું છે કે ઈરાનમાં સત્તાની કમાન હકીકતમાં ઇસ્લામિક રિવોલ્યુશનરી ગાર્ડ કોર્પ્સ (IRGC) ના હાથમાં હોઈ શકે છે. તેમાં કહેવામાં આવ્યું છે કે મોજતબા રાજકીય વ્યવસ્થા પર પોતાનો અધિકાર જમાવી શકતા નથી.
મોજતબા ઘાયલ હોવાના અહેવાલ
ઈઝરાયેલી મીડિયા રિપોર્ટમાં એમ પણ કહેવામાં આવ્યું છે કે 28 ફેબ્રુઆરીના હુમલામાં મોજતબા ખામેનેઈ ઘાયલ થયા હતા. તેમના પગમાં ઈજા થવાની શક્યતા વ્યક્ત કરવામાં આવી છે પરંતુ એવું કહેવામાં આવ્યું છે કે મોજતબા હજુ પણ શારીરિક રીતે કેટલુંક કામ કરવા માટે સક્ષમ છે. આ જ હુમલામાં તેમના પિતા અયાતુલ્લા અલી ખામેનેઈ માર્યા ગયા હતા.
ગુપ્તચર બ્રીફિંગમાં સુપ્રીમ લીડરની ચર્ચા
‘એક્સિયોસ’ સાથે વાત કરતા એક અમેરિકી અધિકારીએ જણાવ્યું કે, “અમને નથી લાગતું કે ઈરાનીઓએ કોઈ મૃત વ્યક્તિને સુપ્રીમ લીડર તરીકે પસંદ કરવા માટે આટલી મહેનત કરી હશે.” રાષ્ટ્રપતિ ડોનાલ્ડ ટ્રમ્પની ઇન્ટેલિજન્સ બ્રીફિંગમાં પણ મોજતબાની ગેરહાજરી ચર્ચાનો વિષય રહી છે. એક્સિયોસના અન્ય એક અહેવાલમાં કહેવામાં આવ્યું છે કે અમેરિકાની રાષ્ટ્રીય સુરક્ષા ટીમ અત્યારે એ વાતનું મૂલ્યાંકન કરી રહી છે કે તેહરાનની અસલી સત્તા કોના હાથમાં છે.
રાજ જિમ્ટ, જેઓ તેલ અવીવની નેશનલ સિક્યુરિટી સ્ટડીઝ ઇન્સ્ટિટ્યૂટમાં ઈરાન એક્સપર્ટ છે, તેમણે અમેરિકન મીડિયા આઉટલેટ એક્સિયોસને જણાવ્યું કે વર્તમાન સુરક્ષા પરિસ્થિતિમાં નવા સુપ્રીમ લીડર સાર્વજનિક રીતે સામે આવે તેવી શક્યતા ઓછી છે. આ દરમિયાન ઈઝરાયેલે ઈરાનના ટોચના અધિકારીઓને સતત નિશાન બનાવ્યા છે. 17 માર્ચે ઈઝરાયેલે સંઘર્ષમાં ઈરાનનો ચહેરો બનેલા રાષ્ટ્રીય સુરક્ષા પ્રમુખ અલી લારીજાનીને મારી નાખ્યા હતા.
