Gujarat IAS Transfer: ગુજરાતમાં મંગળવારે મોટો વહીવટી ફેરબદલ કરવામાં આવ્યો. રાજ્યના 28 સિનિયર IAS અધિકારીઓની બદલીનો આદેશ જાહેર કરવામાં આવ્યો. તેમાં મ્યુનિસિપલ કમિશનર, ડિસ્ટ્રિક્ટ ડેવલપમેન્ટ ઓફિસર (DDO) તેમજ અલગ-અલગ સરકારી કોર્પોરેશનના મેનેજિંગ ડિરેક્ટરનો સમાવેશ થાય છે.
જૂનાગઢના મ્યુનિસિપલ કમિશનર પ્રભાવ જોશીની બદલી ગાંધીનગરમાં GIDCના જૉઇન્ટ મેનેજિંગ ડિરેક્ટર તરીકે કરવામાં આવી છે. તેમની જગ્યાએ, સ્પોર્ટ્સ ઓથોરિટી ઓફ ગુજરાતના સેક્રેટરી આઈઆર વાળાને જૂનાગઢના નવા મ્યુનિસિપલ કમિશનર તરીકે નિયુક્ત કરવામાં આવ્યા છે.
પોરબંદરના મ્યુનિસિપલ કમિશનર એચજે પ્રજાપતિની બદલી અમરેલીના DDO તરીકે કરવામાં આવી છે, જ્યારે સુરત અર્બન ડેવલપમેન્ટ ઓથોરિટી (SUDA)ના CEO સુથાર રાજ રમેશચંદ્રને હવે પોરબંદરના મ્યુનિસિપલ કમિશનર બનાવવામાં આવ્યા છે. સ્મિત સંતોષ લોઢાને સુરત મ્યુનિસિપલ કોર્પોરેશનમાં ડેપ્યુટી મ્યુનિસિપલ કમિશનરની જવાબદારી સોંપવામાં આવી છે.
કેપી જોશીની બદલી PGVCLના MD પદ પરથી દેવભૂમિ-દ્વારકાના DDO તરીકે કરવામાં આવી છે. ડીકે બ્રહ્મભટ્ટને ગુજરાત મેડિકલ સર્વિસિસ કોર્પોરેશન (GMSC)ના MD પદ પરથી બદલી કરીને ગાંધીનગરના DDO તરીકે નિયુક્ત કરવામાં આવ્યા છે.
હિરેન જિતેન્દ્રભાઈ બારોટને દાહોદના નવા DDO તરીકે નિયુક્ત કરવામાં આવ્યા છે. કેએસ ઝાલાની બદલી ટૂરિઝમ કોર્પોરેશનના JMD પદ પરથી ડાંગ-આહવાના DDO તરીકે કરવામાં આવી છે. ગૌરંગભાઈ એચ. મકવાણાને હવે ઉત્તર ગુજરાત ઇલેક્ટ્રિસિટી કંપની લિમિટેડ, મહેસાણાના મેનેજિંગ ડિરેક્ટર બનાવવામાં આવ્યા છે.
કેજે રાઠોડને દક્ષિણ ગુજરાત ઇલેક્ટ્રિસિટી કંપની લિમિટેડ (DGVCL), સુરતના MD તરીકે નિયુક્ત કરવામાં આવ્યા છે, જ્યારે એમડી ચુડાસમાને પશ્ચિમ ગુજરાત ઇલેક્ટ્રિસિટી કંપની લિમિટેડ (PGVCL), રાજકોટના મેનેજિંગ ડિરેક્ટરની જવાબદારી સોંપવામાં આવી છે.
એમપી પંડ્યાને GMSC (ગાંધીનગર)ના MD, બીકે જોશીને કોઓપરેટિવ સોસાયટીઝના રજિસ્ટ્રાર અને સીબી ગાંત્રાને ગુજરાત સ્ટેટ સિવિલ સપ્લાય કોર્પોરેશનના MD બનાવવામાં આવ્યા છે. ઉપરાંત ડીકે પટેલને ગુજરાત એનર્જી ડેવલપમેન્ટ એજન્સી (GEDA)ના નવા ડિરેક્ટર તરીકે નિયુક્ત કરવામાં આવ્યા છે.
