Moscow Restaurant Blast: રશિયાની રાજધાની મોસ્કોમાં ખાનગી કાર્યક્રમ દરમિયાન વિસ્ફોટ, સુરક્ષા ગાર્ડ સહિત ત્રણના મોત
Moscow Restaurant Blast: રશિયાની રાજધાની મોસ્કોના એક રેસ્ટોરન્ટ નજીક થયેલા વિસ્ફોટમાં ત્રણ લોકોના મોત થયા છે, જ્યારે અન્ય 21 લોકો ઘાયલ થયા છે. રશિયન અધિકારીઓએ જણાવ્યું કે વિસ્ફોટ શનિવારે સાંજે મધ્ય મોસ્કોમાં આવેલા એક મોંઘા રેસ્ટોરન્ટ નજીક થયો હતો, જ્યાં એક ખાનગી કાર્યક્રમ ચાલી રહ્યો હતો. આ ઘરેલું રીતે તૈયાર કરવામાં આવેલો બોમ્બ હતો, જેને એક મહિલા લઈને પહોંચી હતી. વિસ્ફોટમાં મહિલાનું પણ મૃત્યુ થયું હતું.
રેસ્ટોરન્ટના પ્રવેશદ્વાર પર થયો વિસ્ફોટ
રશિયાની સરકારી સમાચાર એજન્સી RIA Novostki એ દેશની નેશનલ એન્ટી-ટેરરિઝમ કમિટીને ટાંકીને જણાવ્યું કે એક અજાણી મહિલા કુદ્રિન્સ્કાયા સ્ક્વેર સ્થિત બાલ્ઝી રોસી રેસ્ટોરન્ટમાં પ્રવેશવાનો પ્રયાસ કરી રહી હતી, પરંતુ એક સુરક્ષા ગાર્ડે તેને અટકાવી હતી. મહિલા પાસે એક ઇમ્પ્રોવાઇઝ્ડ એક્સપ્લોસિવ ડિવાઇસ (IED) હતું, જે રેસ્ટોરન્ટમાં પ્રવેશતા પહેલાં જ ફાટી ગયું. વિસ્ફોટમાં મહિલા ઉપરાંત તેને રોકનાર સુરક્ષા ગાર્ડ અને એક ગ્રાહકનું પણ મૃત્યુ થયું.
રશિયન અધિકારીઓએ મહિલાની ઓળખ જાહેર કરી નથી અને તેણે આવું શા માટે કર્યું તેની પણ કોઈ માહિતી આપી નથી. તે પણ સ્પષ્ટ નથી કે તેણે જાણીજોઈને બોમ્બ વિસ્ફોટ કર્યો હતો કે નહીં. શરૂઆતના મીડિયા અહેવાલોમાં વિસ્ફોટનું કારણ ગેસ સિલિન્ડર ફાટવું હોવાનું જણાવાયું હતું, પરંતુ બાદમાં રશિયન એન્ટી-ટેરરિઝમ કમિટીએ સ્પષ્ટ કર્યું કે આ આઈઈડી વિસ્ફોટ હતો.
ખાનગી કાર્યક્રમમાં હાજર મહેમાનો હતા નિશાન પર
રશિયન બિઝનેસ અખબાર કોમર્સેન્ટના અહેવાલ મુજબ હુમલાનું નિશાન રેસ્ટોરન્ટની બહારની ટેરેસ પર ચાલી રહેલા એક ખાનગી કાર્યક્રમમાં હાજર મહેમાનો હતા. અખબારે સૂત્રોના હવાલાથી જણાવ્યું કે કાર્યક્રમ દરમિયાન સુરક્ષાના કડક બંદોબસ્ત હતા, નહીં તો મૃત્યુઆંક ઘણો વધુ હોઈ શક્યો હોત.
સુરક્ષા ગાર્ડને મહિલા પર ગઈ હતી શંકા
અખબારના અહેવાલ મુજબ મહિલા એક બોક્સ લઈને આવી રહી હતી, જેના પર સુરક્ષા ગાર્ડને શંકા ગઈ હતી. પૂછપરછ દરમિયાન મહિલાએ જણાવ્યું કે તેમાં એક ગિફ્ટ છે. ત્યારબાદ ગાર્ડે તેની તપાસ કરવાનો નિર્ણય લીધો. એ જ સમયે તે ડિવાઇસ ફાટી ગયું.
તપાસકર્તાઓનું માનવું છે કે બોમ્બને દૂરથી જ વિસ્ફોટ કરીને સક્રિય કરવામાં આવ્યો હતો. અહેવાલમાં એવું પણ જણાવાયું છે કે મહિલાને કદાચ એ વાતની જાણ નહોતી કે પેકેજની અંદર શું રાખવામાં આવ્યું હતું.
