Indian Railway Timetable 2026: ટ્રેનમાં મુસાફરી કરવા દરમિયાન હવે તમે સમયસર તમારા ગંતવ્ય સ્થાન સુધી પહોંચી શકશો. આ માટે રેલવેએ ‘ટાઈમટેબલ ઓફ ટ્રેન્સ (TAG) ૨૦૨૬’ હેઠળ પોતાના ટાઈમટેબલમાં મોટો ફેરફાર કર્યો છે. આ નવી યોજના હેઠળ ૧૨૨ નવી ટ્રેનો શરૂ કરવામાં આવી છે અને ૫૪૯ ટ્રેનોની ઝડપ વધારવામાં આવી છે. તેનો મુખ્ય હેતુ મુસાફરોના પ્રવાસનો સમય ઘટાડવો, ટ્રેનોને સમયસર ચલાવવી અને રેલવેની કામગીરીને વધુ સારી બનાવવાનો છે.
‘TAG ૨૦૨૬’ માત્ર નવી ટ્રેનો ઉમેરવા પૂરતું મર્યાદિત નથી. તેના હેઠળ હાલની ટ્રેનોના રૂટ પણ લંબાવવામાં આવ્યા છે, કેટલીક ટ્રેનોના ફેરા પણ વધારવામાં આવ્યા છે અને કેટલીક ટ્રેનોને સુપરફાસ્ટ બનાવવામાં આવી છે. આ બધું સમગ્ર રેલવે સિસ્ટમમાં મુસાફરોની સુવિધાને ધ્યાનમાં રાખીને કરવામાં આવી રહ્યું છે. નવી ટ્રેનોમાં કેટલીક ટ્રેનો ‘TAG–ટાઈમ ઓન ડિમાન્ડ (TAG-TOD)’ હેઠળ શરૂ કરવામાં આવી છે.
૫૪૯ ટ્રેનોની સ્પીડ વધી
‘TAG ૨૦૨૬’ હેઠળ દેશભરમાં ૫૪૯ ટ્રેનોની સ્પીડ વધારવામાં આવી છે. આનાથી ટ્રેનો સમયસર ચાલવાની અપેક્ષા વધી ગઈ છે.
આ ૫૪૯ ટ્રેનોમાંથી ૩૭૬ ટ્રેનોની મુસાફરી ૫ થી ૧૫ મિનિટ સુધી ઘટી જશે.
૧૦૫ ટ્રેનોનો સમય ૧૬ થી ૩૦ મિનિટ સુધી બચશે.
૪૮ ટ્રેનોની મુસાફરી ૩૧ થી ૫૯ મિનિટ સુધી ઓછી થશે.
૨૦ ટ્રેનોની મુસાફરી એક કલાક અથવા તેનાથી પણ વધુ ઓછી થઈ જશે.
૧૨૨ નવી ટ્રેનો થઈ શરૂ
વર્ષ ૨૦૨૫ માં શરૂ કરાયેલી ૧૨૨ નવી ટ્રેનોમાં સૌથી વધુ ૬૦ મેઇલ/એક્સપ્રેસ ટ્રેનો છે.
ત્યારબાદ ૨૮ વંદે ભારત ટ્રેનો છે, જે સેમી-હાઇ-સ્પીડ કનેક્ટિવિટીને મજબૂત બનાવશે.
૨૬ અમૃત ભારત ટ્રેનો, ૨ રાજધાની, ૨ જનશતાબ્દી, ૨ હમસફર અને ૨ નમો ભારત રેપિડ રેલ સેવાઓ પણ ઉમેરવામાં આવી છે.
ઝોન મુજબ ફેરફાર
રેલવેના અલગ-અલગ ઝોનમાં આ ફેરફાર થયો છે:
સાઉથ વેસ્ટર્ન રેલવે (SWR): સૌથી વધુ ફાયદો થયો છે. અહીં ૮ નવી ટ્રેનો શરૂ કરાઈ અને ૧૧૭ ટ્રેનોની સ્પીડ વધી.
નોર્થ વેસ્ટર્ન રેલવે (NWR): ૧૨ નવી ટ્રેનો ઉમેરી અને ૮૯ ટ્રેનોની સ્પીડ વધારી.
વેસ્ટર્ન રેલવે (WR): ૧૦ નવી ટ્રેનો શરૂ કરી અને ૮૦ ટ્રેનોની ગતિ વધારી છે.
સાઉધર્ન રેલવે (SR): ૬ નવી ટ્રેનો ઉમેરી અને ૭૫ ટ્રેનોની સ્પીડ વધારી.
નોધર્ન રેલવે (NR): ૨૦ નવી ટ્રેનો ઉમેરી, ૧૦ ટ્રેનોના રૂટ લંબાવ્યા અને ૨૪ ટ્રેનોની સ્પીડ વધારી.
ઈસ્ટ સેન્ટ્રલ રેલવે (ECR): અહીં પણ મોટો વિસ્તાર થયો છે, જ્યાં ૨૦ નવી ટ્રેનો, ૨૦ રૂટ એક્સટેન્શન અને ૧૨ ટ્રેનોની સ્પીડ વધારવામાં આવી છે.
નોર્થઈસ્ટ ફ્રન્ટિયર રેલવે (NFR): ૧૦ નવી ટ્રેનો શરૂ કરી અને ૩૬ ટ્રેનોની સ્પીડ વધારી.
સેન્ટ્રલ રેલવે (CR): ૪ નવી ટ્રેનો ઉમેરી, ૬ રૂટ લંબાવ્યા અને ૩૦ ટ્રેનોની સ્પીડ વધારી.
ઈસ્ટર્ન રેલવે (ER): ૬ નવી ટ્રેનો શરૂ કરી અને ૩૨ ટ્રેનોની સ્પીડ વધારી.
ઈસ્ટ કોસ્ટ રેલવે (ECOR): ૪ નવી ટ્રેનો ઉમેરી અને ૩ ટ્રેનોની સ્પીડ વધારી.
વધુ ભીડવાળા રૂટ્સ પર ખાસ ધ્યાન
SWR, NWR, WR અને SR જેવા ઝોન્સે આ સ્પીડ વધારામાં મોટું યોગદાન આપ્યું છે. આનાથી ખબર પડે છે કે વધુ ભીડવાળા રૂટ્સ પર મુસાફરીનો કુલ સમય ઘટાડવા પર ખાસ ધ્યાન આપવામાં આવ્યું છે. આ ફેરફાર મુસાફરો માટે પ્રવાસને વધુ આરામદાયક અને ઝડપી બનાવવાની દિશામાં એક મોટું પગલું છે.
