India vs New Zealand T20 World Cup Final 2026: ટી-20 ક્રિકેટ વર્લ્ડ કપની ફાઈનલ મેચ માટે અમદાવાદના નરેન્દ્ર મોદી સ્ટેડિયમમાં જોરદાર તૈયારીઓ કરવામાં આવી છે. સુરક્ષાના હાઈટેક બંદોબસ્ત સાથે સમગ્ર વિસ્તારમાં અનેક રીતે મોનિટરિંગ કરવામાં આવી રહ્યું છે. વિશ્વ કપની ફાઈનલ મેચની શરૂઆત સાંજે સાત વાગ્યે થશે. અમદાવાદ સિટી ટ્રાફિક પોલીસે ભારત-ન્યૂઝીલેન્ડ વચ્ચેના ફાઈનલ મુકાબલાને લઈને ટ્રાફિક એડવાઈઝરી પણ જારી કરી છે. ભીડના વ્યવસ્થાપન (Crowd Management) માટે સ્ટેડિયમ પાસેના અનેક રસ્તાઓ બંધ રહેશે. જનપથ ટી-જંક્શનથી સ્ટેડિયમના મેઈન ગેટ સુધીનો રસ્તો ખાનગી વાહનો માટે બંધ રહેશે. મેચ સમયે ટ્રાફિક જામ ઘટાડવા માટે કૃપા રેસીડેન્સી ટી-જંક્શન અને મોટેરા વિલેજ ટી-જંક્શન વચ્ચે પણ અવરજવર ઓછી રહેશે.
પોલીસે આપ્યા બે વૈકલ્પિક રૂટ
ટ્રાફિક જામથી બચવા માટે પોલીસે દર્શકોને કેટલાક અન્ય રસ્તાઓ સૂચવ્યા છે:
વિકલ્પ ૧: તપોવન સર્કલ – ONGC ચોક – વિસત ટી-જંક્શન – જનપથ ટી જંક્શન – પાવરહાઉસ ચોક – પ્રબોધ રાવલ સર્કલ રૂટ.
વિકલ્પ ૨: કૃપા રેસીડેન્સી – શરણ સ્ટેટસ ચોક – ભાટ-કોટેશ્વર રોડ – એપોલો સર્કલ રૂટ.
ભારત અને ન્યૂઝીલેન્ડ વચ્ચે યોજાનારી ટી20 વર્લ્ડ કપ 2026ની ફાઈનલ મેચ માટે સ્ટેડિયમ અને તેની આસપાસ 4,000 થી વધુ સુરક્ષાકર્મીઓ તૈનાત છે. આકાશમાંથી દેખરેખ રાખવા માટે 3 એન્ટી-ડ્રોન સિસ્ટમ લગાવવામાં આવી છે અને 300 થી વધુ CCTV કેમેરા દ્વારા નજર રાખવામાં આવી રહી છે.
અમદાવાદ મેટ્રોએ વધારી ફ્રીક્વન્સી
ક્રિકેટ ફેન્સ માટે અમદાવાદ મેટ્રો (GMRC) એ ટ્રેનોની અવરજવર વધારી દીધી છે. મેચ બાદ ફેન્સને પરત લાવવામાં મદદ કરવા માટે મેટ્રો સેવાઓ મોડી રાત સુધી ચાલશે. મેટ્રો ટ્રેનો રાત્રે 12:50 વાગ્યા સુધી ચાલશે. મોટેરા સ્ટેડિયમ-APMC, ઓલ્ડ હાઈકોર્ટ ઈન્ટરચેન્જ-વસ્ત્રાલ ગામ અને મોટેરા સ્ટેડિયમ-મહાત્મા મંદિર જેવા રૂટ પર સ્પેશિયલ નાઈટ સર્વિસની વ્યવસ્થા કરવામાં આવી છે. ફાઈનલ જોવા માટે અનેક મોટી હસ્તીઓ અમદાવાદ પહોંચી છે, જેમાં કેન્દ્રીય ગૃહમંત્રી અમિત શાહ સાંજે સાડા છ વાગ્યાની આસપાસ સ્ટેડિયમ પહોંચશે.
મેચ દરમિયાન કેવું રહેશે હવામાન?
ભારતીય હવામાન વિભાગ (IMD) ના અમદાવાદ કેન્દ્રના પૂર્વાનુમાન મુજબ:
આકાશ સંપૂર્ણપણે ચોખ્ખું રહેશે અને વરસાદની કોઈ શક્યતા નથી.
અમદાવાદમાં 8 માર્ચના રોજ મહત્તમ તાપમાન 39 ડિગ્રી સેલ્સિયસ રહેશે.
સાંજે જ્યારે મેચ શરૂ થશે ત્યારે તાપમાન 30 ડિગ્રીની આસપાસ રહેવાની અપેક્ષા છે, જેમાં ધીમે-ધીમે ઘટાડો થશે.
હવામાં ભેજનું પ્રમાણ 30 થી 50% ની વચ્ચે રહેશે.
ક્રિકેટ પ્રેમીઓને આશા છે કે ટીમ ઈન્ડિયા કેપ્ટન સૂર્યકુમાર યાદવની આગેવાનીમાં નરેન્દ્ર મોદી સ્ટેડિયમ પર ચેમ્પિયન બનશે અને 19 નવેમ્બર 2023 ના વનડે વર્લ્ડ કપની હારની નિરાશા દૂર કરશે.
