Tata Sierra Score 5 Star Rating: ટાટા સિયેરા (Tata Sierra) હાલમાં માર્કેટની સૌથી ચર્ચિત ગાડીઓમાંથી એક છે. લોન્ચ થયા બાદ તેનું નામ દરેકના મોઢે છવાયું છે. મિડસાઈઝ-SUV સેગમેન્ટમાં આવતી ટાટા મોટર્સની આ નવી કારે સુરક્ષાની દ્રષ્ટિએ એક નવો સ્ટાન્ડર્ડ સેટ કર્યો છે. આ કાર અનેક સેફ્ટી ફીચર્સ સાથે આવે છે અને હવે ભારત NCAP (BNCAP) દ્વારા કરવામાં આવેલા ક્રેશ ટેસ્ટમાં આ SUVને 5-સ્ટાર સેફ્ટી રેટિંગ મળ્યું છે. આ રેટિંગ સિયેરાના તમામ વેરિઅન્ટ્સ પર લાગુ થશે.
પુખ્ત વયના લોકોની સુરક્ષા (Adult Safety)
એડલ્ટ સેફ્ટીના મામલે ટાટા સિયેરાએ 32 માંથી 31.14 પોઈન્ટ્સ સ્કોર કર્યા છે. ક્રેશ ટેસ્ટ દરમિયાન સામેથી થતી ટક્કર (Frontal Crash) માં ડ્રાઈવરના માથા, ગરદન અને પગને ઉત્તમ (Good) સુરક્ષા મળી છે. જોકે, છાતીના ભાગ માટે સુરક્ષાને પર્યાપ્ત (Adequate) ગણાવવામાં આવી છે. સાઈડ ક્રેશ ટેસ્ટમાં ડ્રાઈવર અને બાજુની સીટ પર બેઠેલા વ્યક્તિના માથા, પેટ અને છાતીને સંપૂર્ણ સુરક્ષા મળી છે.
બાળકોની સુરક્ષા (Child Safety)
ચાઈલ્ડ સેફ્ટીની વાત કરીએ તો સિયેરાએ 49 માંથી 44.73 પોઈન્ટ્સ મેળવ્યા છે. ટેસ્ટ દરમિયાન 18 મહિના અને 3 વર્ષના બાળકોના પૂતળા (Dummies) ને પાછળની તરફ મોઢું રાખીને (Rearward-facing) બેસાડવામાં આવ્યા હતા. આમાં 3 વર્ષના બાળકના પૂતળાને ક્રેશ ટેસ્ટમાં પૂરેપૂરા અંક મળ્યા છે, જ્યારે 18 મહિનાના બાળકના પૂતળાનો સ્કોર પણ લગભગ પરફેક્ટ રહ્યો છે.
ટાટા સિયેરાના સુરક્ષા ફીચર્સ (Safety Features)
ટાટા કંપનીએ નવી સિયેરામાં સુરક્ષાનું પૂરતું ધ્યાન રાખ્યું છે:
સ્ટાન્ડર્ડ ફીચર્સ (તમામ મોડલમાં): 6 એરબેગ્સ, ચારેય પૈડામાં ડિસ્ક બ્રેક, રિયર પાર્કિંગ સેન્સર, ઇલેક્ટ્રોનિક પાર્કિંગ બ્રેક અને ટ્રેક્શન કંટ્રોલ.
પ્રીમિયમ ફીચર્સ (ટોપ મોડલ્સમાં): 360-ડિગ્રી કેમેરા, લેવલ 2 ADAS (ઓટોમેટિક ડ્રાઇવિંગ આસિસ્ટન્ટ), બ્લાઈન્ડ સ્પોટ મોનિટરિંગ અને ઓટો-ડિમિંગ IRVM.
સેગમેન્ટ ફર્સ્ટ ફીચર્સ: ટાટા સિયેરામાં ટ્રિપલ સ્ક્રીન સેટઅપ આપવામાં આવ્યું છે. જેમાં એક સ્ક્રીન ઇન્ફોટેનમેન્ટ માટે, એક ઇન્સ્ટ્રુમેન્ટ ક્લસ્ટર માટે અને એક પેસેન્જરના મનોરંજન માટે છે.
કિંમત અને મુકાબલો
કિંમતની વાત કરીએ તો ટાટા સિયેરાની એક્સ-શોરૂમ કિંમત 11.49 લાખથી શરૂ થઈને ટોપ મોડલ માટે 21.29 લાખ રૂપિયા સુધી જાય છે. માર્કેટમાં તેનો મુકાબલો હ્યુન્ડાઈ ક્રેટા, કિયા સેલ્ટોસ, મારુતિ ગ્રાન્ડ વિટારા, ટોયોટા હાઈરાઈડર અને હોન્ડા એલિવેટ જેવી દિગ્ગજ કારો સાથે છે. આ સાથે જ ટાટા કંપની ટૂંક સમયમાં તેનું ઇલેક્ટ્રિક વર્ઝન Sierra.ev લોન્ચ કરવાની તૈયારી પણ કરી રહી છે.
