ગયા મહિને મે મહિનામાં રિટેલ મોંઘવારી દર 4.75 ટકા હતો.
મોંઘવારી મોરચે ચોંકાવનારા સમાચાર છે. કન્ઝ્યુમર પ્રાઇસ ઇન્ડેક્સ (CPI) પર આધારિત છૂટક ફુગાવો જૂનમાં વાર્ષિક ધોરણે 5.08 ટકાની ચાર મહિનાની ઊંચી સપાટીએ પહોંચી ગયો છે. ગયા મહિને મે મહિનામાં રિટેલ મોંઘવારી દર 4.75 ટકા હતો. આ 12 મહિનામાં સૌથી નીચું સ્તર હતું.
આંકડા અને કાર્યક્રમ અમલીકરણ મંત્રાલયે શુક્રવારે એક નિવેદનમાં જણાવ્યું હતું કે શાકભાજી, કઠોળ અને ખાદ્ય ચીજોના ભાવમાં વધારાને કારણે જૂનમાં છૂટક ફુગાવો વધ્યો છે. નેશનલ સ્ટેટેસ્ટિક્સ ઓફિસે જણાવ્યું હતું કે જૂનમાં છૂટક ફુગાવાનો દર 5.08 ટકા હતો. ગયા મહિને મે મહિનામાં તે 4.75 ટકા હતો.
જૂન મહિનામાં ખાદ્ય ફુગાવો વધીને 9.36 ટકા થયો હતો જે મે મહિનામાં 8.69 ટકા હતો. શાકભાજીનો મોંઘવારી દર જૂનમાં 29.32 ટકા હતો જે મે મહિનામાં 27.33 ટકા હતો. કઠોળનો મોંઘવારી દર જૂનમાં 16.07 ટકા હતો જે મે મહિનામાં 17.14 ટકા હતો. જોકે, જૂનમાં કઠોળના મોંઘવારી દરમાં થોડો ઘટાડો થયો છે. જૂનમાં ફળોનો મોંઘવારી દર 7.1 ટકા હતો, જે મે મહિનામાં 6.68 ટકા હતો.
ડેટા અનુસાર, અનાજ અને સંબંધિત ઉત્પાદનોનો મોંઘવારી દર પણ 8.75 ટકા રહ્યો છે, જે મે મહિનામાં 8.69 ટકા હતો. ખાંડનો મોંઘવારી દર 5.83 ટકા હતો જે મે મહિનામાં 5.70 ટકા હતો. જોકે, ઈંડાનો ફુગાવાનો દર ઘટીને 3.99 ટકા થઈ ગયો છે, જે મે મહિનામાં 7.62 ટકા હતો. શહેરી ફુગાવો પણ 4.21 ટકાથી વધીને 4.39 ટકા થયો છે. આ સિવાય ગ્રામીણ મોંઘવારી દર 5.34 ટકાથી વધીને 5.66 ટકા થયો છે.
