Priyanka Chaturvedi: પશ્ચિમ બંગાળ વિધાનસભા ચૂંટણીમાં ભાજપે જબરદસ્ત જીત મેળવી છે, તેની સાથે રાજ્યમાં અનેક જગ્યાએ હિંસાની ઘટનાઓ સામે આવી છે. ભાજપ નેતા અને વિધાનસભાના વિરોધ પક્ષના નેતા શુભેન્દુ અધિકારીના અંગત મદદનીશ (પીએ) ચંદ્રનાથ રથની હત્યા બાદ રાજકીય માહોલ ગરમાયો છે. હવે આ મામલે શિવસેના (યુબીટી) ના પૂર્વ રાજ્યસભા સાંસદ પ્રિયંકા ચતુર્વેદીએ પ્રતિક્રિયા આપી છે.
પ્રિયંકા ચતુર્વેદીએ ચંદ્રનાથ રથની હત્યા પર દુઃખ વ્યક્ત કરતા કહ્યું કે, ચૂંટણીના પરિણામો કોઈ પણ સંજોગોમાં એવી હિંસાને જન્મ આપી શકે નહીં, જેનાથી રાજ્યની કાયદો અને વ્યવસ્થા બગડી જાય.
સ્તબ્ધ અને દુઃખી છું…: પ્રિયંકા ચતુર્વેદી
પ્રિયંકા ચતુર્વેદીએ પોતાના સોશિયલ મીડિયા એકાઉન્ટ એક્સ પર પોસ્ટ કરીને કહ્યું, ‘સવારે ઉઠીને શુભેન્દુ અધિકારીના પીએ ચંદ્રનાથ રથની લક્ષિત હત્યાના સમાચાર સાંભળીને હું સ્તબ્ધ અને દુઃખી છું. ચૂંટણીના પરિણામો એવી હિંસાને જન્મ ન આપી શકે અને ન આપવો જોઈએ, જે રાજ્યમાં કાયદો અને વ્યવસ્થાને પાટા પરથી ઉતારી દે.’
તેમણે કહ્યું, ‘મને આશા છે કે પશ્ચિમ બંગાળ પોલીસ એ સુનિશ્ચિત કરશે કે આ જઘન્ય અપરાધ પાછળ જે પણ આરોપીઓ છે, તેમને કાયદા હેઠળ કડકમાં કડક સજા મળે. ચંદ્રનાથ રથના પરિવારજનો, તેમના મિત્રો, સહકર્મીઓ અને અધિકારી પ્રત્યે મારી ઊંડી સંવેદનાઓ.’ તેમણે “ૐ શાંતિ” લખીને દિવંગત આત્માને શ્રદ્ધાંજલિ આપી.
Shocked & saddened to wake up to the news of the targeted killing of Shri Suvendu Adhikari’s PA, Chandranath Rath. Election outcomes cannot and should not unleash violence that can derail the law and order in the state.
I hope WB Police will ensure the accused behind this…
— Priyanka Chaturvedi🇮🇳 (@priyankac19) May 7, 2026
શું છે મામલો
બુધવાર રાત્રે પશ્ચિમ બંગાળની રાજધાની કોલકાતાને અડીને આવેલા ઉત્તર 24 પરગણા જિલ્લાના મધ્યગ્રામ વિસ્તારમાં ચંદ્રનાથ રથની ગોળી મારીને હત્યા કરવામાં આવી હતી. કહેવામાં આવી રહ્યું છે કે હુમલાખોરોએ તેમના પર અચાનક ફાયરિંગ કર્યું, જેનાથી તેઓ ગંભીર રીતે ઘાયલ થયા હતા. ગોળી વાગ્યા બાદ સ્થાનિક લોકો તરત જ તેમને નજીકના નર્સિંગ હોમમાં લઈ ગયા હતા, પરંતુ હોસ્પિટલ પહોંચતા પહેલા જ તેમનું મોત નીપજ્યું હતું.
આ ઘટના બાદ વિસ્તારમાં તણાવનો માહોલ છે. ભાજપ તરફથી આરોપ લગાવવામાં આવ્યો છે કે આ હત્યા પાછળ ટીએમસી કાર્યકર્તાઓનો હાથ છે. જોકે, ટીએમસી આ આરોપોને નિરાધાર ગણાવી રહી છે અને મામલામાં સીબીઆઈ તપાસની માંગ કરી રહી છે.
ચંદ્રનાથ રથ લાંબા સમયથી શુભેન્દુ અધિકારીના નજીકના સહયોગી માનવામાં આવતા હતા. તેમની હત્યાએ રાજ્યની રાજનીતિમાં નવી ચર્ચા છેડી દીધી છે. પ્રદેશમાં કાયદો અને વ્યવસ્થાને લઈને પણ સવાલો ઉઠી રહ્યા છે, ત્યારે રાજકીય પક્ષો વચ્ચે આરોપ-પ્રત્યારોપનો દોર પણ તેજ થયો છે.
