Latest Gadgets News: Lavaએ 13,999 રૂપિયામાં 6000mAh બેટરી, 120Hz HD+ ડિસ્પ્લે અને Android 16 સાથેનો Lava Virat V1 Pro 5G લોન્ચ કર્યો છે. બીજી તરફ મેમરી કમ્પોનન્ટ્સ અને RAMની વધતી કિંમતની અસર સ્માર્ટફોનના ભાવ પર સ્પષ્ટ જોવા મળી રહી છે. બ્લૂમબર્ગના અહેવાલ અનુસાર Apple આવતા મહિને લોન્ચ થનારી iPhone 18 Pro સીરીઝના ભાવમાં 10,000 રૂપિયા સુધીનો વધારો કરી શકે છે, જ્યારે Motorolaએ પણ પોતાના Edge 70 Fusion અને Edge 60 Fusionના ભાવમાં 3,000 રૂપિયા સુધીનો વધારો કર્યો છે. આ બધાની વચ્ચે Vivo પણ 50MP ZEISS કેમેરા અને 4K 240fps રેકોર્ડિંગ જેવા એડવાન્સ્ડ ફીચર્સ સાથે સપ્ટેમ્બરમાં પોતાની ફ્લેગશિપ Vivo X500 સીરીઝ રજૂ કરવા જઈ રહ્યું છે.
લાવાએ લોન્ચ કર્યો પોતાનો નવો સ્માર્ટફોન
Lavaએ પોતાની Virat સીરીઝમાં નવો Virat V1 Pro 5G ભારતમાં લોન્ચ કરી દીધો છે. તેની કિંમત 13,999 રૂપિયા છે. આ બજેટ 5G સ્માર્ટફોનમાં 6.74 ઇંચની HD+ 120Hz ડિસ્પ્લે, Unisoc T8200 પ્રોસેસર, 6GB RAM, 128GB સ્ટોરેજ અને 18W ફાસ્ટ ચાર્જિંગ સપોર્ટ સાથે 6000mAhની મોટી બેટરી આપવામાં આવી છે. ફોટોગ્રાફી માટે તેમાં 50MPનો AI રિયર કેમેરા અને 8MPનો ફ્રન્ટ કેમેરા મળે છે. આ ઉપરાંત, તે ક્લીન Android 16, IP64 ડસ્ટ અને સ્પ્લેશ રેટિંગ અને 1 વર્ષના OS અપગ્રેડના વચન સાથે આવે છે. આ સ્માર્ટફોન 31 ઓગસ્ટ 2026થી ફ્લિપકાર્ટ પર વેચાણ માટે ઉપલબ્ધ થશે.
વધુ કિંમતમાં લોન્ચ થશે iPhone 18 Pro
અહેવાલ અનુસાર, Apple આવતા મહિને લોન્ચ થનારી પોતાની iPhone 18 Pro સીરીઝની કિંમતોમાં વધારો કરવાની તૈયારી કરી રહ્યું છે. બ્લૂમબર્ગના માર્ક ગુરમેન અનુસાર, DRAM અને NAND મેમરી કમ્પોનન્ટ્સની વધતી કિંમતને કારણે કંપની કિંમતોમાં લગભગ 9% અથવા 100 ડોલર એટલે કે આશરે 10,000 રૂપિયાનો વધારો કરી શકે છે. Samsung અને Google દ્વારા પોતાના ફ્લેગશિપ સ્માર્ટફોનના ભાવ વધાર્યા બાદ Apple પણ પોતાની કિંમતને સંતુલિત કરવા માટે આ પગલું લઈ રહ્યું છે, જેના કારણે અમેરિકામાં iPhone 18 Proની શરૂઆતની કિંમત $1,199 એટલે કે આશરે 1,15,000 રૂપિયા થઈ શકે છે.
Motorolaએ વધાર્યા પોતાના ફોનના ભાવ
ટિપ્સ્ટર સંજુ ચૌધરી અનુસાર, Motorola પોતાના સ્માર્ટફોનની કિંમતોમાં 3,000 રૂપિયા સુધીનો વધારો કરવા જઈ રહ્યું છે. Motorola Edge 70 Fusion ની કિંમત હવે 33,999 રૂપિયાથી શરૂ થઈ ગઈ છે. Motorola Edge 60 Fusion ની નવી કિંમત 29,999 રૂપિયાથી વધીને 32,999 રૂપિયા થઈ ગઈ છે. RAMની કિંમતો વધવાના કારણે ફોનની કિંમતોમાં વધારો થયો છે.
ફરી મોંઘો થયો Redmi Note 15 5G
Xiaomiએ ભારતમાં પોતાના Redmi Note 15 5G અને Redmi 15 5G સ્માર્ટફોનની કિંમતોમાં ફરી એક વખત 2,000 રૂપિયા સુધીનો વધારો કર્યો છે. Redmi Note 15 5Gના 8GB + 128GB વેરિઅન્ટની નવી કિંમત 24,999થી વધીને 26,999 રૂપિયા અને 8GB + 256GB વેરિઅન્ટની કિંમત 29,999 રૂપિયા થઈ ગઈ છે. બીજી તરફ Redmi 15 5Gનું બેઝ વેરિઅન્ટ હવે 20,499 રૂપિયાથી શરૂ થઈ રહ્યું છે.
સપ્ટેમ્બરમાં લોન્ચ થશે Vivo X500 Series
અહેવાલ અનુસાર, Vivo સપ્ટેમ્બરમાં ચીનમાં પોતાની નવી ફ્લેગશિપ સીરીઝ Vivo X500, X500 Pro અને X500 Pro Max લોન્ચ કરવા જઈ રહી છે, જે X300 સીરીઝનું સ્થાન લેશે. કંપનીના ઇન્ટરનલ કોડનેમ Thanos 500 ધરાવતી આ સીરીઝમાં સિનેમા-ગ્રેડ વીડિયોગ્રાફી અને ફોટોગ્રાફી પર ખાસ ધ્યાન આપવામાં આવ્યું છે. તેમાં ZEISS અલ્ટ્રા ડાયનેમિક 50MPનો મેઇન કેમેરા મળશે, જે 17EV ડાયનેમિક રેન્જ, 4K 240fps સ્લો-મોશન અને 4K 120fps HDR વીડિયો રેકોર્ડિંગને સપોર્ટ કરશે.
