Aadhaar SIM Card Limit Check: તમારા આધાર પર કોઈ બીજું તો સિમ નથી ચલાવતું ને? મિનિટોમાં આ રીતે કરો ચેક

એક આધાર કાર્ડ પર કેટલી સિમની પરમિશન?

નવા ટેલિકોમ નિયમો અનુસાર, એક વ્યક્તિના આધાર કાર્ડ પર મહત્તમ ૯ સિમ જ એક્ટિવ રહી શકે છે. જોકે જમ્મુ-કાશ્મીર, આસામ અને નોર્થ-ઈસ્ટ રાજ્યોમાં આ મર્યાદા ૬ સિમ સુધી જ નક્કી કરવામાં આવી છે. જો નક્કી કરેલી મર્યાદાથી વધુ સિમ એક્ટિવ જોવા મળે તો દંડની જોગવાઈ પણ છે. વળી, જો તમારી આઈડી પર કોઈ એવું સિમ ચાલી રહ્યું છે જેનો ઉપયોગ તમે નથી કરી રહ્યા, તો તેનો ગેરઉપયોગ થવા પર કાનૂની જવાબદારી તમારી હોઈ શકે છે. ફ્રોડ, ઠગાઈ કે કોઈ ગેરકાનૂની પ્રવૃત્તિમાં તે સિમનો ઉપયોગ થયો તો તમારે પરેશાની ભોગવવી પડી શકે છે. તેથી એ જાણવું ખૂબ જરૂરી છે કે તમારી આઈડી પર કેટલી અને કઈ કઈ સિમ એક્ટિવ છે.

તમારા આધાર પર કેટલી સિમ એક્ટિવ છે તે કેવી રીતે ચેક કરવું?

તમારા આધાર પર કેટલી સિમ એક્ટિવ છે તે ચેક કરવા માટે ટેલિકોમ ડિપાર્ટમેન્ટ દ્વારા સંચાર સાથી અને TAFCOP પોર્ટલની સુવિધા આપવામાં આવી છે. આના માધ્યમથી તમે ઘરે બેઠા મિનિટોમાં જાણી શકો છો:

• સૌ પ્રથમ tafcop.dgtelecom.gov.in અથવા sancharsaathi.gov.in વેબસાઈટ પર જાઓ.

• હવે હોમ પેજ પર તમારો મોબાઈલ નંબર અને કેપ્ચા ભરો.

• ત્યારબાદ તમારા નંબર પર એક OTP આવશે, તેને ભરીને લોગિન કરો.

• લોગિન કરતાની સાથે જ તમારી આઈડી સાથે જોડાયેલા તમામ મોબાઈલ નંબરોની યાદી સ્ક્રીન પર આવી જશે.

નકલી કે અજાણ્યો નંબર દેખાય તો શું કરવું?

જો યાદીમાં કોઈ એવો નંબર દેખાય જેને તમે ઓળખતા નથી, તો તેની સામે આપેલા Not My Number અથવા Not Required ઓપ્શન પર ક્લિક કરીને રિપોર્ટ કરી શકો છો. ફરિયાદ નોંધાવ્યા પછી તમને એક ટિકિટ આઈડી અથવા રેફરન્સ નંબર મળશે. તપાસ બાદ તે નકલી સિમ બંધ કરી દેવામાં આવશે અથવા તમારી આઈડી પરથી હટાવી દેવામાં આવશે. આના માટે કોઈ ફી લેવામાં આવતી નથી, જોકે સિમ ડીએક્ટિવેટ થવામાં થોડા દિવસો લાગી શકે છે.