Himi Sharma Success Story: જિંદગી ક્યારેક એવી પરીક્ષા લે છે, જ્યાં માણસ પાસે તૂટી જવા સિવાય બીજો કોઈ રસ્તો દેખાતો નથી. પરંતુ કેટલીક વાર્તાઓ એવી હોય છે, જે સાબિત કરી દે છે કે સંજોગો ભલે ગમે તેવા હોય, હિંમત અને આત્મસન્માન માણસને ફરીથી બેઠો કરી શકે છે. આવી જ એક વાર્તા હિમી શર્માની છે, જેની સફર ૫,૦૦૦ રૂપિયાની નોકરીથી શરૂ થઈને કેનેડામાં ૩ કરોડ રૂપિયાના ઘર સુધી પહોંચી.
પ્રેમથી સંઘર્ષ સુધી: જ્યારે પતિએ પ્રોપર્ટીને પસંદ કરી
હિમી શર્માએ જણાવ્યું કે વર્ષ ૨૦૦૫ માં MBA દરમિયાન તેની મુલાકાત પોતાના પતિ સાથે થઈ હતી. જ્ઞાતિને કારણે પરિવારોના વિરોધ છતાં બંનેએ લગ્ન કર્યા. લગ્નના શરૂઆતના ત્રણ વર્ષ સારા રહ્યા, પરંતુ નવેમ્બર ૨૦૧૦ માં તેમની જિંદગી અચાનક બદલાઈ ગઈ. હિમીના જણાવ્યા અનુસાર, “મારા પતિએ મારી અને અમારા બે વર્ષના દીકરાને બદલે ૩ કરોડ રૂપિયાની પ્રોપર્ટી પસંદ કરવાની હતી… તેમણે પ્રોપર્ટી પસંદ કરી.” તે સમયે હિમી એક શિક્ષિકા હતી અને તેનો પગાર મહિને માત્ર ૫,૦૦૦ રૂપિયા હતો.
એકલી માતાની જંગ
પતિના ગયા પછી હિમી પોતાના દીકરા સાથે PG માં રહેવા લાગી, જ્યાં ભાડું જ તેના પગાર કરતા વધારે હતું. દેવું વધતું ગયું અને જિંદગી માત્ર ‘આજ કેવી રીતે પસાર થશે’ ત્યાં સુધી સીમિત થઈ ગઈ. બાદમાં તેને ૩૦,૦૦૦ રૂપિયાની નોકરી મળી અને તે માતા-પિતાના ઘરે પાછી ફરી, પરંતુ ત્યાં પણ રાહત ન મળી. તેના પિતાએ તેની પાસેથી મહિનાના ૧૦,૦૦૦ રૂપિયા ભાડું માંગ્યું. હિમી કહે છે- “મને બોજ સમજવામાં આવવા લાગી.” સૌથી દુઃખદ ક્ષણ ત્યારે આવી, જ્યારે દીકરાની સ્કૂલ ફી ન ભરી શકવાને કારણે તેણે પોતાના ઘરેણાં ગિરવી મૂકવા પડ્યા. તેનો દીકરો જ્યારે પૂછતો- “શું હું સ્કૂલ જઈ શકીશ?” તો તે ક્ષણ આજે પણ હિમીને તોડી નાખે છે.
View this post on Instagram
નવી શરૂઆત: ભારતથી કેનેડા સુધીની સફર
આશરે ૧૦ વર્ષ પહેલાં હિમીએ જિંદગીને ફરીથી બનાવવાનો નિર્ણય લીધો. ૨ લાખ રૂપિયાથી પણ ઓછી બચત સાથે તેણે કેનેડાના વિઝા માટે એપ્લાય કર્યું. ૨૦૧૯ માં તે કેનેડા પહોંચી અને માત્ર એક મહિનામાં કોલેજ પ્રોફેસરની નોકરી મેળવી લીધી. કોઈપણ સપોર્ટ સિસ્ટમ વગર તેણે ધીરે ધીરે પોતાની જિંદગી ફરીથી ઉભી કરી. આજે તે જ મહિલા, જેને ક્યારેક તરછોડી દેવામાં આવી હતી, તે ૩ કરોડ રૂપિયાના ઘરની માલિક છે.
મેં મારી જાતને બચાવી…
હિમી કહે છે- “મને કહેવામાં આવ્યું હતું કે દીકરો મોટો થઈને તને સંભાળશે. પરંતુ મેં રાહ ન જોઈ. મેં પોતે અમને બચાવ્યા.” આજે તેનો દીકરો એવા વાતાવરણમાં મોટો થઈ રહ્યો છે, જ્યાં કોઈ મેણા-ટોણા નથી. હિમી શર્માની વાર્તા માત્ર એક મહિલાની નથી, પરંતુ તે દરેક વ્યક્તિની છે જેને ક્યારેક બોજ સમજવામાં આવ્યા. આ વાર્તા જણાવે છે કે જો પોતાની જાત પર ભરોસો હોય, તો તૂટેલા સંબંધો પણ નવી મંજિલોનો પાયો બની શકે છે.
