London Population Decline: બ્રિટનની રાજધાની લંડન સાથે જોડાયેલો એક ચોંકાવનારો અહેવાલ સામે આવ્યો છે. કોવિડ મહામારીના સમયગાળાને બાદ કરીએ તો વર્ષ 1988 પછી આ પ્રથમ વખત છે જ્યારે લંડનની વસ્તીમાં મોટો ઘટાડો નોંધાયો છે. બ્રિટનના નેશનલ સ્ટેટિસ્ટિક્સ ઑફિસ (ONS)ના તાજા આંકડા જણાવે છે કે આસમાને પહોંચેલા ભાડાં, મોંઘવારી, બ્રિટનના કડક વિઝા નિયમો અને વર્ક ફ્રોમ હોમના હાઇબ્રિડ જોબ કલ્ચરના કારણે હજારો લોકો લંડન છોડીને અન્ય શહેરોમાં વસવાટ કરી રહ્યા છે. ચાલો જાણીએ કે દુનિયાના આ સૌથી મોટા ફાઇનાન્શિયલ હબથી લોકો શા માટે મોઢું ફેરવી રહ્યા છે.
લંડનની વસ્તીમાં કેટલો ઘટાડો થયો?
ONS ના નવા આંકડા મુજબ લંડનની કુલ વસ્તીમાં 0.3 ટકા ઘટાડો નોંધાયો છે. તેનો અર્થ એ છે કે શહેરે અંદાજે 27 હજાર સ્થાનિક રહેવાસીઓને ગુમાવ્યા છે અને હવે અહીંની કુલ વસ્તી ઘટીને 91 લાખ 22 હજાર 909 રહી ગઈ છે. રસપ્રદ વાત એ છે કે સમગ્ર ઇંગ્લેન્ડમાં માત્ર લંડન જ એવો વિસ્તાર રહ્યો છે જ્યાં વસ્તીમાં ઘટાડો થયો છે, જ્યારે નોર્થ વેસ્ટ ઇંગ્લેન્ડ સહિત દેશના બાકીના તમામ રાજ્યોમાં વસ્તીમાં વધારો નોંધાયો છે.
લંડન છોડવાના મુખ્ય કારણો શું છે?
4 લાખથી વધુ લોકોનું સ્થળાંતર: છેલ્લા એક વર્ષ દરમિયાન 4 લાખથી વધુ લોકોએ લંડન છોડીને બ્રિટનના અન્ય વિસ્તારોમાં વસવાટ શરૂ કર્યો છે. લોકો આસમાને પહોંચેલા ભાડાં, મોંઘી હોમ લોન અને ઇન્ટરેસ્ટ રેટ, કામ કરવાની બદલાતી પદ્ધતિઓ અને વધુ સારી જીવનશૈલીની શોધમાં શહેર છોડી રહ્યા છે.
કડક વિઝા નિયમો: અગાઉ લંડન છોડીને જતા લોકોની ખોટ વિદેશથી આવતા લોકો પૂરી કરતા હતા. પરંતુ હવે બ્રિટન સરકારના કડક વિઝા નિયમો અને ઇમિગ્રેશન પ્રતિબંધોના કારણે વિદેશથી આવતા લોકોની સંખ્યામાં મોટો ઘટાડો નોંધાયો છે.
ભાડાં અને મકાનોની બેફામ કિંમતો: લંડનમાં રહેવું હવે સામાન્ય માણસ માટે મુશ્કેલ બનતું જઈ રહ્યું છે. ગ્રેટર લંડનમાં પ્રાઇવેટ ભાડાં ઐતિહાસિક ઊંચાઈએ પહોંચી ગયા છે. ઇનર લંડનના વિસ્તારોમાં ભાડાના મકાનમાં રહેતા લોકોની આવકનો 40થી 50 ટકા હિસ્સો માત્ર મકાનનું ભાડું ચૂકવવામાં જ ખર્ચાઈ જાય છે.
મકાન ખરીદવું બન્યું અશક્ય: લંડનમાં સરેરાશ એક મકાનની કિંમત અંદાજે 5 લાખ પાઉન્ડ એટલે કે લગભગ 5.5 કરોડ રૂપિયા છે, જે સમગ્ર દેશની સરેરાશ કિંમતથી બમણી છે. બેંક ઑફ ઇંગ્લેન્ડના ઊંચા વ્યાજ દરોના કારણે હોમ લોનની ઈએમઆઈ પણ ઘણી વધી ગઈ છે, જેના કારણે નવા ખરીદદારો માટે મકાન ખરીદવું લગભગ અશક્ય બની ગયું છે.
હાઇબ્રિડ વર્ક કલ્ચર: કોરોના બાદથી વર્ક ફ્રોમ હોમ અથવા હાઇબ્રિડ મોડલ સામાન્ય બની ગયું છે. લંડનના 35 ટકાથી વધુ કર્મચારીઓ હવે અઠવાડિયામાં માત્ર 2 અથવા 3 દિવસ જ ઓફિસ જાય છે. ફ્લેક્સિબિલિટી મળ્યા બાદ લોકો લંડનના મોંઘા ખર્ચથી બચવા માટે આસપાસના નાના શહેરો અથવા ગ્રામ્ય વિસ્તારોમાં સ્થળાંતર કરી રહ્યા છે, જ્યાં તેમને લંડન જેવી જ સેલેરી પર વધુ શાંતિપૂર્ણ જીવન મળી રહ્યું છે.
સૌથી વધુ અસર ક્યાં પડી?
ઇંગ્લેન્ડ અને વેલ્સની કુલ વસ્તીની વાત કરીએ તો 2024માં જ્યાં 6 કરોડ 17 લાખ 75 હજાર વસ્તી હતી, ત્યાં 2025માં તે વધીને 6 કરોડ 20 લાખ થઈ ગઈ છે. તેવી જ રીતે લંડનની 33માંથી 23 લોકલ ઓથોરિટી વિસ્તારોમાં વસ્તીમાં ઘટાડો નોંધાયો છે. ખાસ કરીને ઇનર લંડન એટલે કે શહેરના મુખ્ય મધ્ય વિસ્તારોએ તેની સૌથી વધુ અસર અનુભવી છે.
કેમડેન: કેમડેનની વસ્તીમાં 1.8 ટકાનો સૌથી મોટો ઘટાડો નોંધાયો છે.
વેસ્ટમિન્સ્ટર: વેસ્ટમિન્સ્ટરની વસ્તીમાં 1.5 ટકાનો ઘટાડો નોંધાયો છે.
સાઉથવર્ક: સાઉથવર્કની વસ્તીમાં 1.5 ટકાનો ઘટાડો નોંધાયો છે.
આ ઉપરાંત લંડન પ્રત્યે યુવા પરિવારોનો પણ મોહભંગ થઈ રહ્યો છે. 30થી 45 વર્ષની વયના લોકો પોતાના નાના બાળકો સાથે શહેર છોડીને જઈ રહ્યા છે. બાળકોની સંખ્યા ઘટવાના કારણે લંડનના પ્રાથમિક શાળાઓમાં પ્રવેશ લેનારા વિદ્યાર્થીઓની સંખ્યામાં મોટો ઘટાડો આવ્યો છે, જેના કારણે અનેક શાળાઓને એકબીજા સાથે ભેળવવી પડી રહી છે અથવા બંધ કરવી પડી રહી છે.
તેની લંડન પર શું અસર થશે?
વસ્તીમાં ઘટાડો થવાથી લંડન પ્રશાસન (લોકલ ઓથોરિટીઝ)ની કર આવક પર નકારાત્મક અસર પડી રહી છે, જ્યારે વડીલોની સંભાળ અને સામાજિક સહાય માટે નાણાંની માંગ સતત વધી રહી છે. પબ, રેસ્ટોરાં, હોટેલ અને નાના રિટેલ સેક્ટરના વ્યવસાય પર પણ તેની અસર પડી છે. તેનું કારણ એ છે કે સોમવારથી શુક્રવાર સુધીના વીક ડેઝ દરમિયાન શહેરમાં ફરવા અથવા કામકાજ માટે આવતા લોકોની સંખ્યા ઘટી ગઈ છે.
લંડનના મેયર સાદિક ખાન અને શહેરના અન્ય નેતાઓ હવે કેન્દ્ર સરકાર પાસે માંગ કરી રહ્યા છે કે હાઉસિંગ સેક્ટરમાં ઝડપથી સુધારા કરવામાં આવે અને સસ્તા મકાનોના નિર્માણ માટે પૂરતું ફંડ ઉપલબ્ધ કરાવવામાં આવે. જાણકારોનું માનવું છે કે જ્યાં સુધી લંડનમાં રહેવા અને મકાન ખરીદવાના ખર્ચ પર નિયંત્રણ નહીં આવે, ત્યાં સુધી લોકોનું શહેર છોડીને જવાનું આ વલણ યથાવત રહેશે.
