Side effects of synthetic colors: હોળી રમતી વખતે રંગોની પસંદગી પર ખાસ ધ્યાન આપવું જોઈએ. સિન્થેટિક રંગોમાં રહેલા ઇન્ડસ્ટ્રિયલ ડાઈ ત્વચાના બહારના પડને નુકસાન પહોંચાડે છે. સેન્સિટિવ સ્કીન ધરાવતા લોકોમાં એલર્જિક રિએક્શન અને ડર્મેટાઈટિસનું જોખમ વધારે રહે છે. આ સિવાય આ રંગો સ્કેલ્પને ડ્રાય બનાવીને વાળ ખરવાની સમસ્યા પણ વધારી શકે છે.
બાળકો, વડીલો અને એલર્જી કે અસ્થમાના દર્દીઓ માટે હોળીના રંગો પસંદ કરતી વખતે વધારાની સાવચેતી રાખવાની જરૂર છે. હોળી રમવા માટે ઓર્ગેનિક અથવા હર્બલ રંગોનો ઉપયોગ કરવો સુરક્ષિત છે.
સિન્થેટિક રંગોની સ્કીન પર ખરાબ અસર
સિન્થેટિક રંગોમાં લેડ ઓક્સાઈડ, કોપર સલ્ફેટ, મર્ક્યુરી અને ક્રોમિયમ જેવા તત્વો જોવા મળી શકે છે. આ કેમિકલ્સ ત્વચા પર એલર્જી, રેશેશ (ચકામા), ખંજવાળ અને બળતરાનું કારણ બને છે. ઘણા કિસ્સાઓમાં હોળી પછી ત્વચા પર લાલ ચકામા અને ડર્મેટાઈટિસ જેવી સમસ્યાઓ પણ જોવા મળે છે.
સિન્થેટિક રંગોથી આંખોને જોખમ
હોળી દરમિયાન ઉડતા રંગોના બારીક કણો જો આંખોમાં જાય તો બળતરા, લાલાશ અને ચેપનું જોખમ વધી જાય છે. ઘણીવાર લોકો આંખોને ઘસે છે, જેનાથી કોર્નિયાને નુકસાન પણ થઈ શકે છે. જો રંગ આંખમાં જાય તો તરત જ ચોખ્ખા પાણીથી ધોવા જરૂરી છે.
સિન્થેટિક રંગોથી ફેફસાંને નુકસાન
સિન્થેટિક રંગોમાં રહેલા ફાઈન પાર્ટીકલ્સ શ્વાસની સાથે શરીરમાં પ્રવેશીને શ્વસનતંત્રને પ્રભાવિત કરી શકે છે. આનાથી ગળામાં બળતરા, ઉધરસ, શ્વાસ લેવામાં તકલીફ અને એલર્જી જેવી સમસ્યાઓ થઈ શકે છે. અસ્થમાના દર્દીઓમાં આ સમસ્યા વધુ ગંભીર બની શકે છે. જે લોકો પહેલાથી જ અસ્થમા કે એલર્જીથી પીડિત છે, તેમણે ડ્રાય કલર્સથી દૂર રહેવું જોઈએ. રંગોના બારીક કણો ફેફસાંમાં જઈને રિએક્શન પેદા કરી શકે છે. કુદરતી કે ઓર્ગેનિક રંગોનો ઉપયોગ વધુ સુરક્ષિત માનવામાં આવે છે.
સિન્થેટિક રંગોથી વાળમાં થતી સમસ્યાઓ
સિન્થેટિક રંગોમાં રહેલા કેમિકલ્સ વાળની ભેજ છીનવી લે છે, જેનાથી વાળ સૂકા અને નબળા બની જાય છે. ઘણા લોકોમાં હોળી પછી ડેન્ડ્રફ અને હેર ફોલની ફરિયાદ વધી જાય છે. જો રંગ લાંબા સમય સુધી વાળમાં લાગેલો રહે તો સ્કેલ્પ ઇન્ફેક્શનનું જોખમ પણ રહે છે.
સિન્થેટિક રંગોથી કેવી રીતે બચવું?
હોળી રમતા પહેલા ત્વચા અને વાળમાં નાળિયેર કે ઓલિવ ઓઈલ લગાવો
ઓર્ગેનિક અથવા હર્બલ રંગોનો ઉપયોગ કરો
આંખોની સુરક્ષા માટે ચશ્મા પહેરો
વધારે સમય સુધી રંગ શરીર પર રહેવા ન દો
હોળી પછી માઈલ્ડ ક્લીન્ઝરથી ત્વચા સાફ કરો
સુરક્ષિત હોળી એ જ સાચી ખુશી છે.
થોડી સાવચેતી રાખીને હોળીને સુરક્ષિત અને સ્વસ્થ રીતે ઉજવી શકાય છે. હોળી રમવા માટે કુદરતી રંગોનો ઉપયોગ કરીને માત્ર ત્વચા અને વાળને જ સુરક્ષિત રાખી શકાય એવું નથી, પરંતુ તે પર્યાવરણ માટે પણ શ્રેષ્ઠ વિકલ્પ છે.
