Mumbai happiest cities 2025: દુનિયાના સૌથી ખુશહાલ શહેરોની યાદીમાં મુંબઈનો સમાવેશ, અબુધાબી પ્રથમ ક્રમે

દુનિયામાં સૌથી ખુશહાલ શહેરોની વાત આવે ત્યારે અત્યાર સુધી યુરોપના દેશો ડેન્માર્ક, આઈલેન્ડ અથવા ફિનલેન્ડના શહેરો સ્થાન પામતા હતા. જોકે, નવા વૈશ્વિક સરવેમાં વિશ્વના હેપ્પીનેસ રેન્કિંગના ટોચના શહેરોમાં આશ્ચર્યજનક નામ સામે આવ્યા છે. ટાઈમ આઉટ ૨૦૨૫ના હેપ્પીનેસ સિટી ઈન્ડેક્સમાં યુનાઈટેડ આરબ અમિરાતની રાજધાની અબુધાબી દુનિયાના સૌથી ખુશહાલ શહેરમાં ટોચના ક્રમે આવ્યું છે.

અબુધાબીની કુલ વસતી ૨૦ લાખથી વધુ છે. યુએઈમાં તે દુબઈ પછી સૌથી વધુ વસતી ધરાવતું શહેર છે. અબુધાબી યુએઈને બનાવતા સાત અમિરાત્સનું સૌથી મોટું અને સૌથી સમૃદ્ધ શહેર છે. વધુમાં સ્ટેટિસ્ટિકલ એનાલિસીસ વેબસાઈટ નુમ્બેઓના આંકડા મુજબ અબુધાબી વિશ્વનું સૌથી સુરક્ષિત શહેર છે.

શહેરોમાં જીવનની ગુણવત્તા, સુરક્ષા, સંસ્કૃતિ, નાઈટલાઈફ, અફોર્ડેબિલિટી, વોકેબિલિટી, ફૂડ અને ખુશી જેવા માપદંડોના આધારે ટોચના શહેરોની પસંદગી કરાઈ છે. આ સરવેમાં ૧૮,૦૦૦થી વધુ લોકોએ પ્રતિભાવો આપ્યા હતા.