BCCI Chief Selector: અજિત અગરકરની જગ્યાએ મુખ્ય પસંદગીકાર કોણ? આ 5 દાવેદારો સૌથી આગળ
BCCI Chief Selector: BCCIના મુખ્ય પસંદગીકાર અજિત અગરકરને હટાવવામાં આવ્યાની ચર્ચાઓ સામે આવી રહી છે. જોકે બોર્ડ તરફથી હજુ સુધી કોઈ સત્તાવાર જાહેરાત કરવામાં આવી નથી, પરંતુ મીડિયા અહેવાલો અને ક્રિકેટ વર્તુળોમાં નવા ચીફ સિલેક્ટરને લઈને ચર્ચાઓ તેજ બની ગઈ છે. 2027 વનડે વર્લ્ડ કપના રોડમેપને ધ્યાનમાં રાખીને BCCI એક મજબૂત પસંદગી સમિતિનું ગઠન કરવા માંગે છે. એવા સમયે આવો જાણીએ, અજિત અગરકરની જગ્યાએ આવવાની રેસમાં સૌથી આગળ ચાલી રહેલા 5 મુખ્ય દાવેદારો વિશે.
વીવીએસ લક્ષ્મણ
લક્ષ્મણ હાલમાં બેંગલુરુ સ્થિત BCCIના સેન્ટર ઑફ એક્સેલન્સના વડા તરીકે પોતાની સેવાઓ આપી રહ્યા છે. કપ્તાન રોહિત શર્મા પછી ટીમના નવા રોડમેપને તૈયાર કરવા માટે BCCIના ટોચના અધિકારીઓની પ્રથમ પસંદ તરીકે વીવીએસ લક્ષ્મણનું નામ સામે આવ્યું છે. ભારતની યુવા પ્રતિભાઓને ઘડવાનો તેમનો અનુભવ તેમને આ પદ માટે સૌથી સ્વાભાવિક અને મજબૂત દાવેદાર બનાવે છે.
રવિ શાસ્ત્રી
ભારતીય ટીમના પૂર્વ મુખ્ય કોચ તરીકે રવિ શાસ્ત્રીનો કાર્યકાળ અત્યંત સફળ અને ઐતિહાસિક રહ્યો હતો. નિષ્ણાતોનું માનવું છે કે તેમનો નિર્ભય નિર્ણય લેવાનો સ્વભાવ અને ટીમ ઇન્ડિયાના વર્તમાન મુખ્ય માળખા સાથેનો તેમનો ગાઢ સંબંધ તેમને પસંદગી સમિતિના અધ્યક્ષ પદ માટે યોગ્ય વિકલ્પ બનાવે છે.
વીરેન્દ્ર સહેવાગ
પસંદગીકાર તરીકે હવે પૂર્વ વિસ્ફોટક ઓપનિંગ બેટ્સમેન વીરેન્દ્ર સહેવાગનું નામ પણ ઝડપથી સામે આવ્યું છે. સહેવાગ પોતાની આક્રમક ક્રિકેટિંગ ફિલોસોફી માટે જાણીતા છે. વાઇટ બોલ (ટી20 અને ODI) ફોર્મેટમાં નિડરતાથી રમતા યુવા ખેલાડીઓને તક આપવા માટે ચાહકો સહેવાગના નામનું સમર્થન કરી રહ્યા છે.
યુવરાજ સિંહ
ભારતના સર્વશ્રેષ્ઠ ઑલરાઉન્ડરોમાંના એક યુવરાજ સિંહ ચાહકો અને ક્રિકેટ નિષ્ણાતોની પસંદગીમાં સામેલ છે. 2027 વનડે વર્લ્ડ કપના વિઝનને ધ્યાનમાં રાખીને યુવરાજ જેવા મેચ વિજેતા ખેલાડીને ચીફ સિલેક્ટર બનાવીને BCCI ટીમ ઇન્ડિયાના મિડલ ઓર્ડર અને ઑલરાઉન્ડર બેકઅપને વધુ મજબૂત કરવાની દિશામાં વિચાર કરી શકે છે.
રવિચંદ્રન અશ્વિન
પોતાના ટેકનિકલ દિમાગને કારણે અશ્વિનનું નામ પણ સતત આ રેસમાં ચર્ચાઈ રહ્યું છે. BCCIના નિયમો મુજબ નેશનલ સિલેક્ટર બનવા માટે ખેલાડીએ આંતરરાષ્ટ્રીય ક્રિકેટમાંથી નિવૃત્તિ લીધા બાદ ઓછામાં ઓછા 5 વર્ષ પૂર્ણ થયેલા હોવા જરૂરી છે. અશ્વિને તાજેતરમાં જ આંતરરાષ્ટ્રીય ક્રિકેટને અલવિદા કહ્યું છે, જેના કારણે તેમનો કૂલિંગ-ઓફ પિરિયડ 5 વર્ષ પછી પૂર્ણ થશે. એવા સમયે જો BCCI અશ્વિનને મુખ્ય પસંદગીકાર બનાવવા માંગશે, તો બીસીસીઆઈને પોતાના નિયમોમાં ફેરફાર કરવા પડશે.
