PoK Protest: પાકિસ્તાનના કબજાવાળા કાશ્મીર (PoK)માં પાકિસ્તાની સેના અને રેન્જર્સે વિરોધ પ્રદર્શનોને દબાવવા માટે ક્રૂર દમનચક્ર ચાલુ રાખ્યું છે. પાકિસ્તાની સુરક્ષાબળો પ્રદર્શનકારીઓ સામે સીધો ગોળીબાર કરી રહ્યા છે. અહેવાલ મુજબ, છેલ્લા બે દિવસમાં PoKની અંદર આ કાર્યવાહી છતાં વિરોધ સતત વધી રહ્યો છે અને રાત્રિના સમયે પણ પ્રદર્શન થઈ રહ્યા છે. પાકિસ્તાની સેના અને સુરક્ષાબળો સામે લોકોમાં ભારે નારાજગી જોવા મળી રહી છે.
કાશ્મીરમાં વિરોધ પ્રદર્શનોનું નેતૃત્વ કરી રહેલી જ્વૉઇન્ટ અવામી એક્શન કમિટી (JAAC)ના જણાવ્યા અનુસાર, પાકિસ્તાની સુરક્ષાબળોએ હજારો શાંતિપૂર્ણ પ્રદર્શનકારીઓ પર ગોળીબાર કર્યો, જેમાં મંગળવારે 5 લોકોના મોત થયા. આ પહેલાં સોમવારે સુરક્ષાબળોના ગોળીબારમાં 25 પ્રદર્શનકારીઓના મોત થયા હતા.
PoK ને દુનિયાથી અલગ કર્યું, ઇન્ટરનેટ બંધ
PoK માં ગયા જૂન મહિનાથી વિરોધ પ્રદર્શનોનો તબક્કો શરૂ થયો હતો, જેને દબાવવા માટે પાકિસ્તાને નિર્દય કાર્યવાહી કરી છે. વિસ્તારમાં ઇન્ટરનેટ બંધ કરવાના કારણે કોઈપણ સ્પષ્ટ માહિતી મળી રહી નથી. આ વિસ્તારને બાકીની દુનિયાથી સંપૂર્ણપણે અલગ કરી દેવામાં આવ્યો છે અને મોટા પાયે ધરપકડો કરવામાં આવી રહી છે. આ દરમિયાન એમ્નેસ્ટી ઇન્ટરનેશનલે પાકિસ્તાની સત્તાવાળાઓને સંચાર પર લાગેલા પ્રતિબંધો હટાવવાની માંગ કરી છે.
Massive resentment and anger developing across Pakistan Occupied Jammu & Kashmir (PoJK) against Pakistani Punjabis in Pakistan Army, Rangers and Pakistan Govt. Protests continue across PoJK even at night. Youth and women also on the road. pic.twitter.com/iRIbNXYhbV
— Aditya Raj Kaul (@AdityaRajKaul) July 28, 2026
જ્વૉઇન્ટ એક્શન કમિટીના નેતૃત્વ હેઠળ પાકિસ્તાનના કબજાવાળા કાશ્મીરમાં લોકો પાકિસ્તાની સેનાને વિસ્તારમાંથી હટાવવા, ચૂંટણી સુધારા સહિત અનેક માંગણીઓ સાથે રસ્તા પર ઉતર્યા હતા. સોમવારે વિસ્તારમાં વિધાનસભાની ચૂંટણીનો પ્રથમ તબક્કો યોજાયો હતો, જેનો સ્થાનિક જૂથોએ બહિષ્કાર કર્યો છે.
પાકિસ્તાની સેના મૃતદેહોને ગાયબ કરી રહી છે
JAAC ના પ્રવક્તા એસ. એ. ખાને પાકિસ્તાની સુરક્ષાબળો પર નિઃશસ્ત્ર પ્રદર્શનકારીઓ પર ગોળીબાર કરવાનો અને પુરાવા નષ્ટ કરવાનો આરોપ લગાવ્યો છે. તેમણે કહ્યું, સુરક્ષાબળોએ મૃતદેહોને હટાવી દીધા અને મીરપુરની હોસ્પિટલ બંધ કરી દીધી. અમારી પાસે રસ્તાઓ પર લોહીલુહાણ હાલતમાં પડેલા મૃતદેહોના ફોટા અને વીડિયો પુરાવા છે. સુરક્ષાબળોએ પુરાવા નષ્ટ કરવા માટે મૃતદેહોને ત્યાંથી હટાવી દીધા.
JAAC એ પાકિસ્તાન સમક્ષ મૂકી માંગણીઓ
JAAC એ PoKમાં પાકિસ્તાની શોષણનો અંત લાવવા માટે અનેક માંગણીઓ મૂકી છે, જેમાંથી કેટલીક મુખ્ય માંગણીઓ નીચે મુજબ છે-
1- મંત્રીઓ, વરિષ્ઠ અધિકારીઓ, ન્યાયાધીશો અને નોકરશાહોના વિશેષાધિકારોનો અંત લાવવો.
2- પાકિસ્તાનમાં શરણાર્થીઓ માટે PoK વિધાનસભામાં અનામત રાખવામાં આવેલી 12 બેઠકો રદ કરવી.
3- દરેક માટે મફત અને સમાન શિક્ષણ આપવું તથા વિદ્યાર્થી સંઘોને ફરી કાર્યરત કરવા.
4- PoKમાં આંતરરાષ્ટ્રીય હવાઈ મથકનું નિર્માણ કરવું.
5- સરકારી નોકરીઓમાં શરણાર્થી ક્વોટા રદ કરવો અને ક્વોટા પ્રણાલીનો અંત લાવવો.
6- વીજળી અને ઘઉં/લોટના મુદ્દે કરાયેલા વચનોનો અમલ કરવો.
7- જ્વૉઇન્ટ અવામી એક્શન કમિટીના કાર્યકરો વિરુદ્ધના પોલીસ કેસો પાછા ખેંચવા.
8- કાળા કાયદા અને દમનકારી બાહ્ય સુરક્ષા પગલાં દૂર કરવા.
9- સ્થાનિક ઉત્પાદન ખર્ચના આધારે વીજળીના દરોમાં ઘટાડો કરવો.
10- નાગરિકોના અધિકારોનું રક્ષણ કરવું અને JAAC સાથે અગાઉ થયેલા તમામ કરારોનો અમલ કરવો.
