Income Tax Refund Status: શું તમે પણ સમયસર તમારું ઇનકમ ટેક્સ રિટર્ન (ITR) ફાઈલ કરી દીધું હતું, પરંતુ બેંક એકાઉન્ટમાં હજુ સુધી રિફંડની ઘંટડી નથી વાગી? જો તમે પણ એ લાખો કરદાતાઓમાંથી એક છો, જે દરરોજ સવારે પોતાનું બેંક બેલેન્સ ચેક કરે છે, તો આ સમાચાર તમારા માટે જ છે. હકીકતમાં ટેક્સ વિભાગે સ્પષ્ટ કરી દીધું છે કે રિફંડમાં વિલંબનું કારણ કોઈ ટેકનિકલ ખામી નથી, પરંતુ તમારી કેટલીક નાની ભૂલો હોઈ શકે છે. આ સમાચારમાં અમે તમને જણાવીશું કે આખરે તમારું રિફંડ ક્યાં અને કેમ અટવાયેલું છે.
બેંક એકાઉન્ટનું પ્રી-વેલિડેશન ન હોવું
ટેક્સ વિભાગ હવે માત્ર તે જ ખાતાઓમાં પૈસા મોકલે છે જે પોર્ટલ પર પ્રી-વેલિડેટ (Pre-validate) થયેલા છે. જો તમે નવું ખાતું ખોલાવ્યું છે અથવા જૂના ખાતાની માહિતી અપડેટ નથી કરી, તો રિફંડ ફેલ સ્ટેટસ બતાવી શકે છે. આવા કિસ્સામાં જલ્દીથી ઈ-ફાઇલિંગ પોર્ટલ પર જઈને ‘My Bank Account’ સેક્શનમાં તમારું ખાતું વેલિડેટ કરો.
મોટી રકમના રિફંડ પર વિભાગની નજર
સીબીડીટી (CBDT) અનુસાર, આ વર્ષે વિભાગ તે રિફંડની ઊંડાણપૂર્વક તપાસ કરી રહ્યું છે, જ્યાં રિફંડની રકમ ખૂબ વધારે છે અથવા જ્યાં ટેક્સપેયર્સે ફોર્મ-૧૬ સિવાય અલગથી ડિડક્શન (જેમ કે HRA, 80C) ક્લેમ કર્યા છે. વિભાગ એ ખાતરી કરવા માંગે છે કે ક્યાંય આ ક્લેમ ખોટા તો નથી ને.
ઈ-વેરિફિકેશનમાં વિલંબ
માત્ર આઈટીઆર ફાઈલ કરવું પૂરતું નથી. ફાઈલ કર્યાના ૩૦ દિવસની અંદર તેને ઈ-વેરિફાય કરવું પણ જરૂરી છે. જો તમે હજુ સુધી આધાર ઓટીપી દ્વારા તેને વેરિફાય નથી કર્યું, તો તમારું રિટર્ન પ્રોસેસ જ નહીં થાય અને રિફંડ ભૂલી જાઓ.
ડેટામાં મિસમેચ
જો તમારી દર્શાવેલી આવક અને તમારા AIS (Annual Information Statement) અથવા 26AS માં દેખાતી માહિતીમાં થોડો પણ તફાવત છે, તો સિસ્ટમ તમારું રિફંડ અટકાવી દે છે. ક્રિપ્ટોકરન્સી અથવા ઓનલાઇન ગેમિંગથી થયેલી કમાણી ન દર્શાવવી પણ ભારે પડી શકે છે.
તમારું રિફંડ સ્ટેટસ આ રીતે ચેક કરો
ઇનકમ ટેક્સ પોર્ટલ પર લોગ-ઈન કરો.
‘e-File’ ટેબ પર જાઓ અને ‘Income Tax Returns’ પર ક્લિક કરો.
‘View Filed Returns’ પર જાઓ.
અહીં તમે તમારા લેટેસ્ટ રિટર્નનું સ્ટેટસ જોઈ શકો છો. જો ત્યાં ‘Refund Reissue’ નો ઓપ્શન દેખાઈ રહ્યો છે, તો સમજી લેવું કે બેંક ડિટેલ્સમાં ભૂલ હતી.
એક્સપર્ટની સલાહ
ટેક્સ એક્સપર્ટ્સનું કહેવું છે કે જો તમારું રિફંડ અટકેલું છે, તો તમારા ‘Pending Action’ ટેબને જરૂર ચેક કરો. વિભાગે ઘણા ટેક્સપેયર્સને નોટિસ માટે મેસેજ મોકલ્યા છે, જેનો જવાબ ન આપવા પર રિફંડ હંમેશ માટે અટકી શકે છે.
