Asinara Donkey Mutation: ભૂમધ્ય સમુદ્રમાં આવેલા સાર્ડીનિયાના કિનારા નજીક અસિનારા નામનો એક આઇલેન્ડ છે. અહીં ક્યારેક ઇટાલિયન લોકોની સારી એવી વસ્તી રહેતી હતી. 100 વર્ષથી વધુ સમય પહેલાં લેવાયેલા એક નિર્ણયને કારણે અહીંથી માનવ વસવાટ સમાપ્ત થઈ ગયો. માણસો તો અહીંથી ચાલ્યા ગયા, પરંતુ તેમની સાથે રહેતા ગધેડાઓની મોટી સંખ્યા આ ટાપુ પર રહી ગઈ. હવે 100 વર્ષ બાદ વૈજ્ઞાનિકોએ આ ટાપુ પર રહી ગયેલા ગધેડાઓમાં એક ખાસ મ્યુટેશન જોયું છે, જે જિનેટિક્સના અભ્યાસ માટે રસપ્રદ કેસ બની ગયો છે.
જેલ કૉલોની માટે ટાપુ પરથી લોકોને હટાવવામાં આવ્યા
વર્ષ 1885માં ઇટાલીના સામ્રાજ્યે ટાપુ પરથી લોકોને હટાવવાનો આદેશ આપ્યો હતો, કારણ કે અહીં ક્વૉરન્ટાઇન સેન્ટર અને જેલ કૉલોની બનાવવાની હતી. અહીંથી 45થી 52 પરિવારોના આશરે 500 લોકોને પોતાનાં ઘર અને જમીન છોડીને જવું પડ્યું હતું. મોટા ભાગના પરિવારો સાર્ડીનિયાની મુખ્ય ભૂમિ પર વસી ગયા. પરંતુ ટાપુ પર ભરવાડો જે ગધેડાઓનો ઉપયોગ કરતા હતા, તે ત્યાં જ રહી ગયા.
માણસોના ગયા પછી પ્રાણીનો રંગ બદલાઈ ગયો
માણસોના ગયા બાદ આશરે 50 વર્ગ કિમીના આ ટાપુ પર આ પ્રાણીઓ અલગ પડી ગયા હતા. વર્ષ 2016માં કરવામાં આવેલા એક અભ્યાસમાં સંશોધકોએ આ ગધેડાઓમાં એક વિચિત્ર બદલાવ જોયો. તેમના શરીર પર સફેદ રંગ આવી ગયો હતો. બાદમાં તેની પાછળનું એક ખાસ જિનેટિક કારણ જાણવા મળ્યું. એનિમલ જિનેટિક્સમાં પ્રકાશિત 2016ના અભ્યાસમાં તેનો સંબંધ એક મ્યુટેશન સાથે જોડવામાં આવ્યો.
બોલોગ્ના યુનિવર્સિટીમાં ઉત્ઝેરી અને તેમના સાથીઓએ 7 સફેદ અને 6 ગ્રે ગધેડા સહિત કુલ 13 ગધેડાઓની તપાસ કરી. તપાસમાં એક ખૂબ જ ખાસ એમિનો એસિડ ભાગમાં મિસસેન્સ મ્યુટેશન જોવા મળ્યું. આ ફેરફાર કૉપર-બાઇન્ડિંગ સાઇટને નુકસાન પહોંચાડે છે, જે ટાયરોસિનેઝ એન્ઝાઇમ યોગ્ય રીતે કામ કરે તે માટે જરૂરી છે. 82 ગધેડાઓના મોટા સૅમ્પલ પર કરવામાં આવેલા અભ્યાસથી જાણવા મળ્યું કે શરીરના રંગ અને મ્યુટેશન વચ્ચેનો સંબંધ એટલો મહત્વપૂર્ણ હતો કે તેને માત્ર સંયોગ માની શકાય નહીં.
