Lashkar Commander Bilal Arif Salafi Killed: ભારતની ધરતી પર હિંસા ફેલાવનારા આતંકી સંગઠન લશ્કર-એ-તૈયબાના કમાન્ડરની પાકિસ્તાનમાં હત્યા કરવામાં આવી છે. અહેવાલ મુજબ, લશ્કર કમાન્ડર બિલાલ આરિફ સલાફીને શનિવારે ઈદની નમાઝ બાદ ચાકુ અને ગોળી મારીને મોતને ઘાટ ઉતારી દેવામાં આવ્યો છે. બિલાલને મુરીદકેમાં લશ્કરના તબાહ થઈ ચૂકેલા મુખ્યાલય પાસે મારવામાં આવ્યો છે. ‘ઓપરેશન સિંદૂર’ દરમિયાન ભારતે લશ્કરના આ આતંકી અડ્ડાને નિશાન બનાવ્યો હતો.
લશ્કર માટે આતંકીઓની ભરતી
હત્યા પાછળનું કારણ જાણી શકાયું નથી, પરંતુ સૂત્રોને શંકા છે કે આ કોઈ પારિવારિક વિવાદનું પરિણામ હોઈ શકે છે. સૂત્રોએ જણાવ્યું કે હત્યામાં સામેલ લોકોની ધરપકડ કરવામાં આવી છે. બિલાલ આતંકવાદી સંગઠનમાં મહત્વની ભૂમિકા ભજવતો હતો. મુરીદકે શાખામાં આતંકીઓની ભરતી તેના શિરે હતી. તેનું કામ યુવાનોની ઓળખ કરીને તેમને સંગઠન માટે તૈયાર કરવાનું હતું. આ દરમિયાન તે લોકોનું બ્રેઈનવોશ પણ કરતો હતો. જોકે, તે ભારતમાં કોઈ કેસમાં વોન્ટેડ લિસ્ટમાં નહોતો.
ગ્લોબલ ટેરર ઇન્ડેક્સમાં ટોપ પર પાકિસ્તાન
દાયકાઓ સુધી આતંકવાદને પાળનાર-પોષનાર પાકિસ્તાન હવે પોતે જ તેનો શિકાર બન્યું છે. ગ્લોબલ ટેરરિઝમ ઇન્ડેક્સ (GTI) ના 2026 ના રિપોર્ટમાં પાકિસ્તાન પ્રથમ વખત પ્રથમ સ્થાને પહોંચી ગયું છે. વર્ષ 2025 માં પાકિસ્તાન વિશ્વનો સૌથી વધુ આતંકવાદ પ્રભાવિત દેશ હતો, જ્યાં 1,045 આતંકવાદી હુમલા થયા હતા. આમાં 1,139 લોકોના મોત થયા અને 1,595 લોકો ઘાયલ થયા હતા. આ દરમિયાન 655 લોકોને બંધક બનાવવામાં આવ્યા હતા.
TTP બન્યું પાકિસ્તાન માટે સૌથી મોટી મુસીબત
દક્ષિણ એશિયામાં પાકિસ્તાન એકમાત્ર દેશ છે, જ્યાં 2025 માં સુરક્ષાની સ્થિતિ વણસી છે. પાકિસ્તાનના બે પ્રાંત ખૈબર પખ્તુનખ્વા અને બલૂચિસ્તાન સૌથી વધુ આતંકી હિંસાનો શિકાર બન્યા છે. ખૈબર પખ્તુનખ્વા માં તહરીક-એ-તાલીબાન પાકિસ્તાન (TTP) ઇસ્લામાબાદ માટે મુસીબત બની ગયું છે. TTP એ 2025 માં 595 હુમલા કર્યા જેમાં 637 લોકો માર્યા ગયા. પાકિસ્તાને અફઘાનિસ્તાનની તાલીબાન સરકાર પર TTP ને સંરક્ષણ આપવાનો આરોપ લગાવ્યો છે.
આના કારણે ઓક્ટોબર 2025 પછી ઘણી વખત બંને પક્ષો વચ્ચે સીધો સંઘર્ષ થયો છે. ઈદ પહેલા પાકિસ્તાને કાબુલમાં એક મેડિકલ સુવિધા પર હવાઈ હુમલો કર્યો હતો, જેમાં 400 લોકો માર્યા ગયા હતા. અફઘાન તાલીબાને પણ પાકિસ્તાન પર ડ્રોનથી હુમલા કર્યા છે. બંને પક્ષોએ ઈદ માટે સંઘર્ષ વિરામ પર સહમતિ દર્શાવી હતી.
